[ID0088] MN6a (85v-86v) 86r

2 ¶Reyna del çielo en cuyo amor ando
& en qujen es toda la mj eſperança
de cuyo dulçe & begnjno reguardo
mana & deſçiende toda mj esperança
en ti mj ſen̄ora por tu omjldança
fue ennobleſçida la humana natura
quando el factor fizo ſu fatura
Como el graçioſo poeta romança
3 ¶Enel tu vientre ſe ençendio el amor
que conſolo la natura humana
fue germenjda enti aquella flor
que deſçendio dela luz ſoberana
Tu eres del çielo luz merediana
de caridat & dela mortal gente
eneſta vida tranſytoria preſente
De eſperança eres muy clara fontana
4 ¶Tanto magnjfica & de tanto valor
eres ſen̄ora que qujen graçia demanda
Syn requerir & llamar tu fauor
Yerra la via & non ſabe do anda
La tu potençia que enel çielo manda
aqujen te llama ſienpre le acorre
mas much̄as vezes al demandar precorre
E de tales flores es tu gujrlanda