[ID0532] PN1 (68v-71r) 68v

Eſte dezir fizo & ordeno miçer
frāçiſco ynperial natural de Jenoua
eſtante & morador q̄ fue en la
muy noble çibdat de ſeuilla el
qal dezir fizo al naſçimio de nr̄o ſen̄o
el Rey don juā qando naſçio en la
çibdat de toro an̄o de m.cccc.v an̄os
& es fecho E fundado de fermoſa
& ſotil Jnvençion E de limadas
Diçiones
1 En dos ſeteçiētos & mas doſſ & tres
paſſando el aurora viniendo el dia
viernes pmero del terçero meſſ
nō ſe ſy uelaua ni ſe ſy dormia
oy en boz alta o dulçe marya
a guiſſa de duen̄a que eſtauā de to
& dio tres gritos de ſy dixo el qarto
valed me ſen̄ora eſperaça mia
2 En bozes mas baxas le oy dezir
ſalue Regina ſaluad me ſen̄ora
& a las de vezes me pareſçie oyr
mod hed god hep alūbrad magor
a guiſa de duen̄a q̄ deuota ora
quam bonus deus le oy Rezar
oy le a manera De apiaDar
çayha bical habin al cabila mora
3 Abri los ojos & vime en vn prado
de candidas rroſſas & flores oliētes
de verdes laureles todo çircūdado
a guiſa de caua de dos biuas fuēts̄
naſçia vn arroyo de aguas corriētes
caliente la vna & la otra frya
& vna con otra nō ſe boluia
otro tal nunca vierō los ojos biuiēts̄
4 La calda corria por partes de fuera
ſegūt mi abiſſo creo que ſeria
por guarda del prado a gis de luſſera
tan fuertemente tanto feruia
por partes de dentro la fria corria
de que ſe van̄auā las Roſſas & flors̄
cantauā lugaros a los rruy ſen̄ors̄
com̄o acoſtūbrā al alua del dia
5 El rronper del agua erā tenores
que cō las dulçes aues concodauā
en bozes baxas & de las mayores
ducaynas & farpas otſy ſon̄auā
& oy perſonas que manſo cātauā
mas por diſtançia nō las entēdia
& tanto era ſu grant melodia
que todas las aues mucho ſe alegrauā