[ID0543] PN1 (15v-16r) 15v

Eſte dezir fizo el dicho alfonſo aluarez
quando el dicho ſen̄or Rey don ēryque
fino en la çibdat de toledo el
domīgo de nauidad del an̄o de mill &
quatro çientos & ſyete el qual dezir
es muy bien fecho E de ſotil invençion &
adelante deſte dicho dezir eſtā
otros dezires los quales tractan del
Dicho ffynamento del ſen̄or Rey
1 La noche terçera dela Redempçiō
del an̄o de mill qatro çientos & ſyete
nō ſe en qal guisa mis manos apete
tan grande pauor ove de vn viſſiō
que vy en fygura de Reuelaçiō
a tres duen̄as triſtes q̄ llanto faziā
que en los ſenblantes biuas pareſçia
cubiertas de duelo & de tribulaçiō
2 La vna traya corona de eſparto
ſu cara fermoſa rronpida & ſāgriēta
la otra vna eſpada deſnuda oriniēta
la mançana ayuſſo q̄brado el vn qarto
la otra gemia com̄o duen̄a ē parto
teniendo en ſus manos vn cruz de palo
& yvan diziendo ay mundo vyl malo
de tus mouimientos me qito & m̄ to
3 yo qando las vy maguera lloroſas
ſenti q̄ erā duen̄as de muy alta ḡſſa
& con Reuerēçia com̄o qiē ſe aviſa
fynq̄ los finojos diziendo fermoſas
q̄ nueva ſon eſtas atan doloroSas
o por qien fazedes llanto tā eſquiſo
o com̄o dire ally donde biuo
qales ſon los nōbres de tales trs̄ coſas
4 La pmera dixo cō muy grāt māzilla
& tu nō me ves q̄ ſo la muy tryſte
don̄a catalina q̄ tu ayer viſte
aſſaz conſolada Reyna de caſtilla
& agora me vees llamādo meſylla
perdi mi marydo mi Rey & mi ſen̄or
aſſy que jamas biuire con dolor
poniendo mi meſſa ſȳ Ryca baxilla
5 La ſegūda dixo yo ſo la Juſtiçia
Sen̄ora & amarga ſyn todo abrigo
perdi mi pilar mi rrey mi amigo
que me ſoſtenia ſyn toda maliçia
agora cuytada toda mi cobdiçia
es yr a beuir a yermos eſtran̄os
biē com̄o begina faſta los veȳte an̄os
ſaluo ſy ſe ēmiēda algūa avariçia
6 En voz dolorida con geſto lloroſo
la terçera dixo fablādo muy q̄do
yo ſoy la ygl̄ia grande de toledo
a quiē atarō de ſu buē eſpoſo
& agora me qierē caſar ē nō oſo
al caſamio dezir le de Non
por q̄ los q̄ vienē de cōt avin̄on
afirmā al novio por muy genoſo
7 E deſq̄ la cauſa vy tan declarada
muy biē entēdi las duens qiē erā
& dixe les ſen̄oras los q̄ deſeſperā
pereſçē & pierdē la gloria otorgada
& vos gentil Reyna q̄dades aſada
con vr̄o buē fijo lyndo rrey dō juā
por qiē las eſpan̄as vos adorarā
& aſſy biuiredes ſeruida & loada