[ID0059] PN4 103v

El ſexto ſoneto el auctor fabla e dize que lagua faze ſenyal en
la piedra e que haue viſto deſpues de gran guerra gran paç e q̄l
bien ni mal duran mas que ſu trabaio nunca ceſſa e dize aſſi
meſmo que ſi ſu Senyora le quiere que dezir que ella non le
ha culpa en el trabaio que paſſa que fara el ala ordenança de
arriba conuiene a ſaber delos fados alos quales ninguno delos
mortales non pueden fazer reſiſtencia
1 ¶Elnlagua blanda en la piedra dura
Faze por curſo del tiempo ſenyal
E la Rueda rodante la ventura
Tranſmuda e trueca del genus humanal
Pazes he viſto apres grand rotura
Atarde dura bien nin faze mal
Mas la mi pena yamas ha folgura
Nin punto ceſſa mi Langor mortal
¶Por ventura diras ydola mia
Que a ti non plaze de mi perdimiento
Antes reprueuas mi loca porfia
Di que faremos del ordenamiento
De amor que priua toda Senyoria
E rige e manda nueſtro entendimiento