[ID1743] SA10A (79r-88r) 79r

¶eſte dezir q̄ ſe sygue conpuſo & ordeno o guyllen de ſe
villa vezino de ſegovia el qual ſe djryge al q̄ sy
gue ſu voluntad dexando el ſerviçio de djos
1 a ty q̄ prosygues por tu voluntad
onbre cryado del ljmo terreſtre
no tengas por algo loques vanydad
mas llama tu ſeſo & dj que te adjestre
procura la glorya & terna ſalud
& teme la muerte q̄ a todos ſaltea
faz que tus viçios provoquē virtud
pues ajquel breve tp̄o dela joventud
mūy mas preſto paſa q̄ corre oborea
2 tu byves enbuelto en viçios & males
ſo vervio loçano en alta coluna
tenjendo gran fuzia en los tenporales
byen es malvados que ſon de fortuna
sy myras veras medjante deſtreza
pues es tranſytoryo aqueſte bollyçio
pagados los devdos de naturaleza
que pro te ternia tu mūcha rriq̄za
teſoros & onrras & gran benefiçio
3 sy prynçipe eres q̄ as de rregir
gentes & pueblos en grā monarchia
perdonas el malo q̄ deves punyr
soltando las rriendas dela tiranja
secutas en todo malvada cudjçia
zelando tu nonbre aver mas pujāça
seyendo temido penar la maljçia
tener aq̄l peſo ygual de justiçia
cō grā fortaleza & preseveranaça