[ID3350] SA8 (1v-2v) 1v

Gomez manrriq̄ al
marq̄s de ſantillana
Su tȳo
1 O fuente manante de ſabiduria
por qien ſe nobleçē los Reynos deſpan̄a
cuȳa fortaleza ha ſeydo taman̄a
q̄ nunca fue viſta en vos couardia
juſtiçia continua vueſtra cōpan̄ja
templança jamas de vos ſe deſpega
aſſi q̄ por vos mendoça & la vega
ſeran de perpetua & grād nōbradia.
2 Vos ſoys fuerte muro dl̄os afflegidos
agudo coch̄illo delos malfech̄ores
moſtrays vos leon alos vençedores
& manſa paloma contra los vēçidos
ſoys caudillo delos entendidos
ſabeys enl̄ biē muȳ mas q̄ nj̄guno
ſoys aplazible & nunca importuno
alos conoſçientes & no conoſçidos.
3 Vos ſoys dl̄os ſabios el mas exçelente
& dl̄os poetas maȳor q̄ lucano
pues el̄as lides el fuerte troyano
nō fue mas ardid nj̄ tāto valiente
de vr̄as bōdades nō ſe q̄ mas cuēte
nō por q̄ dl̄las me falte q̄ diga
ſi non q̄ naſçiſtes por anſia & fatiga
delos coronjſtas del ſiglo preſēte.