Dutton Corpus

11CG Contents

Related witnesses for 11CG-148

[ID6115]11CG-148(86v-87r)(5x10)

Otras de cartagena entre el coraçon y los ojos. y habla el coraçon

¶Enemigos vos cauſaſtes
mi dolor y cauſa fuſtes
porque mirando mataſtes
mi gloria y reſſucitaſtes
5pena y penſamientos triſtes
Porque queſiſte quitarme
libertad por do ſoy preſo
porque queſiſtes matarme
que ya no pudo eſcaparme
10fuerça ni razon ni ſeſo
¶Dizen los ojos.
¶Coraçon vos nos guiaſtes
a mirar por do queſiſtes
coraçon vos nos leuaſtes
15pues ſi tormento paſſaſtes
doblada pena nos diſtes
Diſteſnos mal que lloramos
lloramos vueſtra paſſion
pues la pena que paſſamos
20noſotros triſtes pagamos
no os quexes vos coraçon
¶Reſponde el coraçon.
¶No puede ſer ygualado
mi mal con el que paſſays
25o como es diferenciado
ſer yo el laſtimado
voſotros los que llorays
Llorays mi graue penar
llorays porque muero y peno
30ved ſi ſe puede ygualar
el dolor ſentir ſin par
con llorar el mal ageno
¶Replican los ojos.
¶Coraçon triſte amanſad
35no os moſtreys tan doloroſo
pues por vueſtra voluntad
quedaſtes ſin libertad
y noſotros ſin repoſo
Sin repoſo ni plazer
40ſin plazer porque queſiſtes
coraçon auer de ſer
ocaſion de os perder
a vos y a noſotros triſtes
¶Echa el baſtoncartagena entre eſtos dos que ſe debatian
45¶Yo pago la culpa agena
ſufriendo grandes dolores
yo ſo el catiuo en cadena
en quien ſe encierra la pena
deſtos dos competidores
50Que la muerte me cauſaron
lo qual es fuerça ſofrir
pues los ojos que miraron
y el coraçon que engañaron
quiſo tan bien conſentir