Dutton Corpus

96JE Contents

Related witnesses for 96JE-125

 
[ID3868]96JE-125(91r)(3, 6x7)

Uillancico.

Ya no quiero tener fe
ſeñora ſi no con vos
pues que ſoys madre de dios.
Uos ſoys hija vos ſoys madre
5de aquel meſmo que os crio
el es vueſtro hijo y padre
y por madre avos nos dio:
a todos nos redimio
en querer nacer de vos
10bendita madre de dios.
Soys madre de dios y mia
ſoys el fin de mi eſperança
ſoys mi plazer y alegria
ſoys mi bien aventurança:
15mi remedio no ſe alcança
por otra ſi no por vos
virgen y madre de dios.
Que mudança me mudo
qual amor pudo vencerme
20quando mi fe os olvido
por en otro amor meterme:
que eſtava para perderme
ſi no fuera ya por vos
madre y eſpoſa de dios.
25Mis verdaderos amores
ya con vos tener los quiero
pues que ſoys de pecadores
el remedio verdadero:
que ſi bien alguno eſpero
30es por ſerviros a vos
hueſpeda y ſierva de dios.
Los que vuestro nombre llaman
ſon muy preſto remediados
los que con amor os aman
35ſiempre biven conſolados:
nunca ſon deſamparados
los que tienen fe con vos
ſagrado templo de dios.

Fin.

A vos quiero por ſeñora
40en tanto quanto biviere
ſed vos mi procuradora
quando deſte mundo fuere:
porque deſpues que muriere
no me aparte yo de vos
45palacio y caſa de dios.