Dutton Corpus

ME1 Contents

Related witnesses for ME1-37

 
[ID0345]ME1-37(62v-63r)(5x8)

Deſpedimiento de lope deſtuñiga

De mi tanto bien amada
qual en mundo jamas
non fue viſta nin fallada
que fueſſe tanto nin mas
5pues deſcognoſçeis aſi
quien vos ſiruio bien amando
yo vos quito quanto mando
ſobre mi meſmo vos di
Quitovos mas obediençia
10e dotada ſeñoria
con toda la reuerençia
como ſieruo deuia
pues que mereçeis ya vos
de todo punto perder
15como perdio luçifer
toda la gloria de dios
Quito vos el penſamiento
que penſar en vos non pueda
pues vuestro mereſçimiento
20de todo punto lo veda
lo que mas me peſa es
que por coplas vos loe
de coſas que çierto ſe
que ſon todas al reues
25Otroſi mi voluntad
quito de vuestra priſion
e torno mi libertad
a ſu flaca poſſiſſion
e por final concluſion
30mas en vos quede mi quexo
mis lagrimas e paſſion
de todo punto vos dexo
Yo vos do carta de quita
e vos dad a mi de quito
35yd ſantiguada e bendita
e dexad a mi bendito
nunca mas mi coraçon
ſo vuestra mano terneiſ
por ende (f#) ſeſo fareiſ
40en buſcar otro garçon