Dutton Corpus

ME1 Contents

Related witnesses for ME1-72

 
[ID0447]ME1-72(91v-92r)(4, 4x10)

MACIAS

Ay ſeñora en que fiança
e por çierto ſin dubdança
non lo ayas por vengança
mi triſtura
5Non por que mereçimiento
a ti lo demanda
mas por tu merçed conplida
duelete del perdimiento
en que anda
10en aventura mi vida
faz que non ſea perdida
en ti la mi eſperança
e tu faras buen eſtança
e meſura
15A ti adoro agora
e todavia
con puro leal talente
miembrate de mi ſeñora
por corteſia
20e ſe te venga en miente
e non dexes tu ſiruiente
perder por oluidança
pues que toda mi nembrança
es tu figura
25Non ſe lugar atan fuerte
en que me defienda
de la tu muy grand beldad
en ti tengo ya la muerte
ſin contienda
30ſi me conval tu beldad
e por que eſto es verdad
ay amor en renembrança
en mi coraçon tengo vna lança
de amargura
35Aqueſta lançada ſin falla
ay cuitado
non me la dieron de muro
nin la priſe en batalla
mal peccado
40mas veyendo a ti ſeguro
amor falſo e perjuro
que me firio ſin tardança
atal fue la mi andança
ſin ventura