Dutton Corpus

MH1 Contents

Related witnesses for MH1-237

[ID0501]MH1-237(362v-363r)(6x8)

¶Eſte dezir fizo bartolome garcia decordoua frayle que agora es en el moneſterio de frex del balen burgos quando naſçio el Rey nuestro ſeñoren la çibdad de toro del qual dezir se pago mucho elſeñor Rey don enrrique ſu padre

por muy grand virtud fue eſtableſçido
el ſu ligamiento fue en ora muy buena
& tengo que eſtaua la luna bien llena
el çielo & la tierra muy eſclareſçido
5quando eſte infante fue apareſçido
fijo del alto Rey de caſtilla
el qual fue moſtrado por gran marauilla
ſegund las ſeñales en que fue naſçido
antes del alua por digna abundançia
10fue ſu naſçimiento en ora ſuaue
en eſa ſazon vi cantar vn ave
en vn ſanto tenplo do fize mi eſtança
el canto era duçe con mucha alegrança
& bien concordado con plazer & Riſo
15pareſçiome eſta ave ſer de parayſo
por eſto fuy ledo con buena eſperança
Los quatro elementos con ſus poſeſiones
& ſiete planetas que ſon muy preçiadas
& los doze ſynos con las Rycas fadas
20todas acordaron de dar altos dones
& fazer conplido en ſus condiçiones
a eſte infante ardid poderoſo
que ſea muy franco cortes & amoroſo
& cobre las gentes por ſus coraçones
25 aqueſte ſubra de los doze pares
por fechos loados de grant oſamiento
& ſegund la lenpieza de ſu fundamiento
ſera preçedente en los quatro pilares
Ca tiene por ſi la planeta mares
30la qual en batalla es de grand valia
& por la ſu eſpada de Caualleria
ſera muy temido por muchos lugares
Agora ſeñores yo non ſo adeuino
nin me entremeto de ſer tal profeta
35mas ſienpre dire que la ſu planeta
de aqueſte infante fue en Rico ſino
ca eſte ſera el muy fuerte pino
que todo el mundo terna en ſu peſo
& ſu diſcreçion ſera de grand ſeſo
40ca de muchas partes le viene ſer dino
por eſto las gentes con grand voluntad
por todo el mundo devian fazer
muchas alegrias con mucho plazer
eſpeçialmente por la criſtiandad
45pues que nos vino tan grand claridad
en que fallamos buen cobro & anparo
infante fermoſo amado muy caro
franco eſcogido con tan grand caſtidad