Dutton Corpus

MH1 Contents

Related witnesses for MH1-274

[ID0539 Y 1370]MH1-274(8x7,8)

¶dezir del dicho

¶ante la muy alta corte
del dios de amor ſoy çitado
& malamente acuſado
por vos eſtrella de norte
5deziendo que fize error
en vos dar tan grant loor
que por en mereſco morte
¶Dizen que vos enſalçe
entre las altas ſeñores
10& como Roſas entre flores
dizen que vos eſmere
con luzero & con eſtrellas
llama a par de çentellas
dizen que vos yguale
15¶Dizen que me deſdezir
faran como fementido
& en el canpo metido
me faran cruel morir
& ſi eſto non fezieren
20que do vuestros ojos vieren
me faga luego foyr
¶en vuestras manos amiga
fago jura & promeſa
& a la venus deeſa
25que eſte Rebto por vos ſiga
antel alto dios de amor
defendiendo vuestro onor
de quien deſloor vos diga
¶Por que noble armadura
30conviene de tal pelea
donde dios de amor vea
la vuestra grant fermoſura
con vuestras manos labrad
las armas apropiad
35a la vuestra gentil meſura
¶De vuestra cabelladura
de toda boça labredes
contra mi bien que me dedes
ſi fuere vuestra meſura
40bien çeñida & apretada
los vuestros braços amada
me çiñades por çintura
¶el vuestro muy gentil talle
noble fecçion de cara
45Reſplandeçiente & clara
qual el ſol en mayo ſalle
ſea yelmo con çimera
non creo en la frontera
otra tan propia ſe falle
50¶Del vuestro gentil aſeo
ſean las ſobreſeñales
non creo que las dio tales
ginebra nin fizo yſeo
ca ſeria marauilla
55de ſer tales en caſtilla
que quanto yo non las veo
¶Mi eſcudo ſera todo
de lindeza arneſado
quanto ha de oro a lodo
60del vuestro auentajado
gentilmente enbraçado
con beldad & garrideza
de las que por ſu nobleza
mereſçen mayor eſtado