Dutton Corpus

MH1 Contents

Related witnesses for MH1-3

 
[ID0113]MH1-3(16v-17r)(6x8)

¶Dezir de ferrnand perez de guzman

¶El gentil niño narçiſo
en vna fuente engañado
de ſi meſmo enamorado
muy eſquiua muerte priſo
5ſeñora de noble Riſo
& de muy graçioſo brio
(+a mirar) fuente nin Rio
non ſe atreua vuestro viſo
¶Deſeando vuestra vida
10avn vos do otro conſejo
que non ſe mire en eſpejo
vuestra faz clara garrida
quien ſabe ſy la perdida
vos ſepa ende tan fuerte
15que fueſe en vos la muerte
de narçiſo Repetida
¶Engañaron ſotilmente
con ymaginaçion loca
pocos dias hedad poca
20al niño bien pareſçiente
eſtrella Reſplandeçiente
penſad eſtas doſ vias
de beldad & pocos dias
la qual en vos ſe ſiente
25¶quien ſynon los ſeraphines
vos vençen de fermoſura
de beldad & de freſcura
linda flor de las jazmines
pues Roſa de los matines
30aued la fuente eſcuſada
por aquella que es llamada
eſtrella de los marines
¶Prados & Roſas & flores
otorgo que los miredes
35& plazeme que eſcuchedes
dulçes cantares de amores
mas por ſol nin por colores
tal codiçia non vos çiegue
vuestra viſta ſienpre niegue
40las fuentes & ſus dulçores
¶Con plazer & gozo e Riſa
Ruego a dios que ſienpre creſcan
vuestros bienes & floreſcan
mas que los de dido & liſa
45& ſienpre en toda guiſa
que jamas yo ſufra pena
peſevos flor de açuçena
en fin de aqueſta peſquiſa