Dutton Corpus

MP3 Contents

Related witnesses for MP3-57

[ID3353]MP3-57(89-91)(89-91)

¶querellas#de#fortuna ¶De gomez manrrique

¶No partirme de querervos
por çierto mas que a ninguna
mas apartarme de ver vos
quiere mi negra fortuna
5que mis males faſta agora
procuro
& por eſto me vos dio
por ſeñora
¶Eſta vos fizo mas bella
10que quantas yo vi jamas
eſta vos fizo donzella
de las diſcretas la mas
eſta vos dio fermoſura
acabada
15pero fizo vos menguada
de meſura
(90)
¶Eſta vos fizo graçioſa
en ſuperrlatiuo grado
mas no punto piadoſa
20por creçer en mi cuydado
fizo vos entre las buenas
la mas buena
por fazer mayor mi pena
de las penas
25¶Eſta que ſin conpañera
en el mundo vos crio
quiſo que faſta que muera
ſienpre ſea vuestro yo
& que ſeñora ſeays
30de mi vida
& quiere que ſer querida
no querays
¶Eſta que deſque naçi
me fue mortal enemiga
35eſta contraria de mi
& vueſtra leal amiga
poniendo ſu gran poder
en acabarme
trabaja por apartarme
40de vos ver
¶Mas no ſeñora ſin duda
de ſienpre bien vos amar
que ſi el norte no ſe muda
yo no me puedo mudar
45ca no vos vieron mis ojos
en tal ora
que trocar pueda ſeñora
mis enojos
¶Los quales ſienpre creçiendo
50penan mi vida menguando
& mis anguſtias plañiendo
çiegan mis ojos llorando
pero ſi vos ſoys contenta
de lo tal
55no me puede venir mal
que muncho ſienta

Fin

¶Pongo fin a mis rrazones
dichas con gran deſatiento
que mis ſecretas paſiones
60traſtorrnan mi ſentimiento
& fazen que deſatine
mi eſcreuir
por me de vos deſpedir
tal qual vine