Dutton Corpus

PN1 Contents

Related witnesses for PN1-1

[ID1147]PN1-1(4r)(7x8)

[cantiga]

Aqui ſe comiençan las cantigas muy eſcandidas & graçioſamente aſonadas las preguntas & rreſpueſtas ſotiles & bien ordenadas & los dezires muy limados & bien fechos & de infinitas inuençiones que fizo & ordeno en ſu tienpo el muy ſabyo & diſcreto varon & muy ſyngular conponedor en eſta muy graçioſa arte dela poetrya & gaya çiençia alfonso aluarez de villaſandino el qual por graçia infuſa que dios enel puſo fue eſmalte & luz & eſpejo & corona & monarca de todos los poetas & trobadores que faſta oy fueron en toda eſpaña.

(4r)
¶GEneroſa muy fermoſa
ſyn manſilla virgen ſanta
Virtuoſa Poderoſa
de quien luçifer ſe eſpanta
5tanta.
fue la tu grand omildat que toda la Trenidat
en ty ſe ençierra ſe canta
Plazentero fue el primero
gozo ſeñora que oviſte
10quando el vero menſajero
te ſaluo tu Reſpondiſte
troxiſte
en tu Seno vyrginal
al padre çeleſtial
15al qual ſyn dolor pariſte
Quien ſabrya nin dyria
quanta fue tu omildança
o marya Puerta & vya
de ſalud E de folgança
20fyança
tengo en ty muy dulçe flor
que por ſer tu Seruidor
avre de dyos Perdonança
Noble rroſa fija E eſpoſa
25de dyos & ſu madre dyna
amoroſa es la tu Proſa
“aue eſtela Matutyna” [ID8981 Cita]
enclyna
tus orejas de Dulçor
30oyendo A mi pecador
ayudando me feſtyna
Quien te apela mariſtela
flor del angel ſaludada
ſyn cabtela non rreçela
35la tenebroſa morada
cryada
fuſte lympia Syn error
por quel alto Enperador
te nos dyo Por abogada
40Que parryas al mexias
dixeron gentes diſcretas
geremias E yſſayas
daniel & otras profetas
poetas
45te loan E Loaran
& los ſantos cantaran
por ty en gloria chançonetas
O beata ynmaculata
ſyn error deſde abeniçio
50byen barata quien te cata
manſamente ſyn bollycio
ſeruiçio
faze a dyos nuestro Señor
quien te ſyrue por amor
55non dando a ſus carnes viçio

Eſta cantyga de ſanta marya tan noble & tan bien ordenada fizo el dicho alfonſo aluarez de villa ſandino ſu deſfecha della por arte deſtrybote la qual es muy bien fecha & ordenada & graçioſamente aſſonada & tal que muchas vezes dixo el dicho alfonſſo aluarez que ſerya lyberado del enemigo por ella.