Dutton Corpus

PN1 Contents

Related witnesses for PN1-234

[ID0539]PN1-234(75v-76r)(11x7)

Eſte dezir fizo el dicho miçer françiſcoinperial a la dicha eſtrella diana & quexandoſſe de los otros que lo RequeſtauanE Pidiendo le a ella armas

ANte la muy alta corte
del dios damor ſo çitado
& malamente acuſado
por vos eſtrella del norte
5diçiendo que fiz error
en vos dar tan grat loor
que por en mereſco morte
Dizen que vos enſalçe
entre las altas ſeñores
10commo rroſſa entre las flores
dizen que vos eſmere
con luzero con eſtrellas
llama a par de çentellas
diçen que vos yguale
15 Dizen que me deſdezir
faran commo fementido
o que en el canpo metido
me faran cruel morir
& ſy eſto non fizieren
20que do vuestros ojos vieren
me faga luego foyr
En vuestras manos amiga
fago jura & promeſſa
& a la grant venus dieſſa
25que eſte rrebto por vos ſygua
ante el alto dios de amor
defendido vuestro honor
de quien vos deſloor diga
E por que la noble armadura
30conviene a tal pelea
donde dios de amor vea
la vuestra grant fermoſura
con vuestras manos labrat
las armas & apropiedat
35la vuestra gentil figura
E de vuestra Cabelladura
de toda poça labredes
cota mi bien que me dedes
ſy fuere vuestra meſura
40& çeñida bien apretada
con vuestros braços amada
me çingades por çintura
Vuestros ojos amoroſſos
ſſeñora me dat por lança
45& aved firme eſperança
que con ella mentiroſos
fare a los maldezidores
de vos la flor de las flores
pues de uos son enbidioſos
50Vuestro ayre Delicado
quiero leuar por eſcudo
non temo con el nin dudo
maldezir deſmeſurado
& ſean con el por devyſſa
55 vuestros dientes boca & riſſa
& dezir muy adonado
El vuestro graçioſo talle
& muy buen torno de cara
Resplandeçiente & clara
60qual el ſol en mayo ſale
ſe yelmo con çimera
non creo quen la frontera
otro tan propio ſe falle
Vuestra nariz afilada
65ſea flecha muy polida
con las peſtañas mi vida
rricamente en plumada
vuestro çejo muy fermoso
ſea el arco amoroſſo
70con que lançe al entrada
Vueſtro gracioſo Aſſeo
ſean laſ ſobreſeñales
non creo que las dio tales
ginebra nin fizo yſſeo
75& ſerie gran marauilla
fallar tales en caſtilla
que quanto yo non las veo