Dutton Corpus

PN1 Contents

Related witnesses for PN1-246

[ID1380 R 0531]PN1-246(79v-80r)(9x7)

Eſte dezir#en#rrespuesta fizo el dicho maeſtro frayalfonſo de la monja en rreſpueſta deſteotro dezir de ençima aquel dichomiçer françiſco le fizo en el qual le declaraque coſa es fortuna & commo & enque manera Se deue entenDer

En ditado apueſto muy ynperial
denueſtas françiſco atan ſyn rrazon
a mi la fortuna que en toda ſazon
mueuo la rrueda & non por egual
5traſtorno los exes & contra natura
en que tu dizes que a toda criatura
le fago enojo E yerro mortal
De querella antigua & vieja quiſtion
fazes demanda & pregunta nueua
10non es marauilla que a eſto a ty mueua
dubda o eſpanto o otra entinçion
ca dauid & boeçio & avn Jeremias
tañieron tronpas a las orejas mias
con eſta querella & aqueſte ſermon
15Sy ſopieſſes mi coſtunbre & propiedat
& commo en çirculo ſo aſſentada
non terrnies quexa porque aſſoſegada
tu non me vees en vna egualdat
ca eſta fue ſyenpre la mi Condiçion
20de mudar la rrueda en çerculaçion
& tal ſera ſiempre la mi Calidat
Dizes que contra natura ſienpre mueuo
las coſſas non es rrazon verdadera
antes yo ſygo el curſo & manera
25de la naturaleza & yo de nuevo
non fago coſſa fuera de natura
antes guardo propiedat & meſura
a todos en ſſu guiſſa & ſegunt que deuo
El çielo es claro a vezes eſcuro
30la mar es braua deſpues amanſada
la tierra bien verde deſpues deſecada
& por que a tu ſſeſo pareſçe tan duro
que mueua traſtorne aſy a la mi rrueda
pienſas tu que yo non faga nin pueda
35lo que natura fa de moto tan puro.
Non fago ſynrrazon nin contra derecho
nin ay coſſa mala en mi Señorio
avnque tu ſſeſſo con grant deſuario
yerre judgando mi obra & mi fecho
40ca yo tengo peſſo & tengo valança
& ſſy tu poco ſſeſo non lo alcança
calla cuytado & pon lo a tu Pecho
Ca ſy algunt omne quiere bien obrar
& yo non le dexo con mi juſtiçia
45& ſſi lo mereſçe por la ſu maliçia
por ende vn ſſeſo deues tomar
dare de lo mio a quien yo quiſyere
a otro non nada ſſy aſſi lo fiziele
non mas que dezir nin por que rebtar
50Sant pablo apoſtol con quanto ſabia
non ſopo otra coſſa aqui declarar
el dedo en la boca penſo de cuydar
o altitudo dey grant ſabiduria
Son mucho inconprehenſibiliçia
55los tus ſſecretos & la tu judiçia
que entender ninguno non podria
Suelto es tu filo ſſegunt que pareſçe
ruego te amigo que tomes mi ſſeſo
dios es fortuna & el tiene el peſſo
60el da a cada vno lo que le mereſçe
rruegal que te de lo que a el pluguiere
obra bien ſegunt la gracia que te diere
aqueſto es cordura & lo al pereſçe