Dutton Corpus

PN1 Contents

Related witnesses for PN1-336

[ID1462]PN1-336(120v-121r)(8x8, 4)

Eſte dezir#en#contenplaçion fizo & ordeno el dichogonçalo martines de medina commo enmanera de contenplaçion de diosfablando por metaforas eſcuraſpor los males & pecados que ſonen el mundo el qual dezir es bueno &bien fecho ſegund la entençionſobre que ſe funda el ſu dezir:

O inconpable la tu deydad
commo conſiente tanta corruçion
atantos delitos yerros & maldat
engaños ſofyſmas mentiras trayçion
5cruezas cobdiçias & fornicaçion
artes & lazos & enduzimientos
quebrantar de fe & de juramentos
& males eſtranos ſyn conparaçion
ya es falleçida la ley natural
10de padre a fijo parientes hermanos
& non es alguno ata comunal
que a ſu prouecho non abra las manos
avnque ſea daño de ſus mas çercanos
& que por ello faga mill falſyas
15del todo pereſçen ſeñor las tus vyas
& los tus preçetos altos ſoberanos
Es la ſoberuia en grand abundança
& la tu juſtiçia del todo Cayda
& dela verdat non ay rremenbrança
20la mintira rreyna & es infyngida
la vondat es triſte & muy abatida
que ya non la preçian nin vale vn cornado
la maldat inpera in vltimo grado
& vy por el mundo ſu ſeña tendida
25 Es en ſu puxança la grad(!) vanagloria
& el auariçia Enxalça ſu vando
& de caridat non es ya memoria
& la caſtidat ſe anda ençerrando
todas las vyrtudes ſe van alterando
30el mundo es venido en grand dyuiſion
non ay lealtad nin buena entençion
que todo pereſçe & ſe va maluando
Sabe que la mi infinita vondat
a todos rreclama a la ſaluaçion
35yo enbie mi fijo con grand piedat
que del humanal fueſe rredençion
el qual ſufrio muerte & tribulaçion
& muchas injurias & eſcarneçimientos
dolores & plagas açotes tormentos
40muy inconparables de grand turbaçion
El qual los ſufrio con grand omildança
por que ſu obra fueſe conoſçida
& por dar enxienplo & ſanta ordenança
por do cada vno rrygieſe ſu vida
45por ende tu onbre & coſa adormida
abre tus ojos & ſey acordado
que ſy te infingeres de fazer pecado
por fuerça tu alma a de ſer perdida
yo eſpero a todos faſta la ſu fyn
50por que conoſcan mi grand ſeñorio
aſy al flaco commo al palaçin
dy para ſaluarſe egual ald(↑ue)rio
el muy poderoſo por ſu poderio
non ſera tenido nin mas rreſeruado
55que el pobrezillo ſy fuere culpado
nin el mas letrado quel neçio ſandio
A los que mas ſufro avran mayor pena
por que la juſtiçia ſea conſeruada
& los que quitaren de ſy la cadena
60yran a la glorya ques aparejada
la fyn de ſus obras es taja çerrada
por do cada vno a de ſer judgado
por ende non ſeas amigo enganado
obrando en virtudes paſes tu jornada

ffynida

fynida

65Segund lo fizieres avras la ſoldada
& aſy vyrtudes commo los pecados
te ſeran preſentes & todos moſtrados
quando mi ſentençia ovyere a ſer dada