Dutton Corpus

PN1 Contents

Related witnesses for PN1-488

[ID1613]PN1-488(159v)(5x8)

Pregunta de nicolas contra el maeſtro

ſſEñor maeſtro diego yo vine aqui
a que me libredes vn plyto agora
que es entre mi E vna Señora
que yo fuy mirar a grant mal de mi
5 ca en eſſe dia en que yo La vy
luego en eſſe punto & aqueſa ſazon
me fue a rrobar el mi Coraçon
& nunca lo dello deſpues rreſçebi
Ca puede aver por mi Pecado
10faſta quatro años & vn poco mas
que yo el cuytado de mi niculas
deſta manera fuy aſſy Robado
& deſque lo mio me touo forçado
& vio que ya era en el ſu poder
15nunca me quiſo fablar nin ver
ſſynon en plaza do non leo grando
Quando vo yo a ella por me querellar
mueſtra me luego ſañudo ſu geſto
& dize amigo partid vos de aqueſto
20que non vos cunple de mas porfiar
& diz que la dixe que non me quier dar
en mi coraçon que ella de mi tiene
pues ora veredes que dios vos debien
ſy faze aguyſado de me lo non dar
25Mas faga tanto por ſu corteſſya
entregue me ella lo que me rrobo
& tornelo ally Ado lo ſaco
ſano ſyn liſſyon ſegunt que ſoLya
eſtar en el arca do yo Lo tenia
30alegre muy Ledo con todo plazer
& ſy ella me quiera aqueſto fazer
luego me parto de aqueſta porfia
Mas vos bien vedes que non es guiſado
que la yo dexo con eſto Pasar
35pues tan grant tiempo me fizo andar
ſyn mi coraçon & triſte cuytado
agora ſeñor pues vos he contado
aſſy breuemente el fecho qual es
vos eſte pleyto ſed el juez
40dat y ſentençia commo buen letrado