Dutton Corpus

PN6 Contents

Related witnesses for PN6-33

[ID0114]PN6-33(134v-135r)(6x8)

dezir que fizo fernan ſanches quando fue al lugar do fue naçido & fallo los onbres todos viejos

¶dezid amigos parienteſ ſeñores
daqueſta villa del mi naçimiento
do vin por rrepoſo del mi entendimiento
voy con anguſtias & grandes doloreſ
5que mudamiento eſ eſte que veo
en vueſtros ſenblanteſ jeſto meneo
quanto mas firme miro & oteo
mi coraçon ſyente mayoreſ tenbloreſ
¶que vos conoçi los tyenpos paſados
10cuerpos derechos grueſos loçanos
fuerteſ fermoſos graçioſos vfanoſ
ſueltos ardidos de vos muy pagadoſ
agora vos fallo los dientes podridos
los ojos muy fondos en ſy encogidos
15los vueſtros coloreſ buenoſ perdidos
ſecos & canos & muy arrugados
¶caydas las çejas las fazes turbadas
los paſos cortillos & bien vagaroſos
y los contynentes no muy donoſos
20las vueſtras brauezas ya ſoſegadas
el vno fablando vn poco çaçea
el otro andando a vezes coxquea
el otro ſe pone antojos que vea
de dya en dia paſando jornadas
25 ¶el vno ſe quexa de mal de la yjada
el otro ſe ſyente de los pulmones
el otro padeçe mal de rriñones
el otro de gota muy afincada
el otro no tyene quixal en la boca
30el otro ſe ſyente la viſta muy poca
el otro ſy come luego lo troca
el otro eſcupe flema ſalada
\(Pplo mas que me peſa daqueſta fazienda
eſ que me cabe dende gran parte
35& que no ſe via megia ni arte
por do eſtos maleſ rreçiban enmienda
maſ anteſ y tan de mal en peor
aſy a vaſallo como a ſeñor
faſta que venga el gran ſegador
40que de fin a todo ſegun la leyenda
¶Y pues en eſto la nuestra rriqueza
no pone cobro ſegun que pareçe
mas ella & nos de todo pereçe
conviene que luego ſyn otra pereza
45fagamos enmienda de nuestros pecados
con muchas limosnas bien confeſados
por que del fuego do van los dañados
nos librel ſeñor por ſu gran nobleza

fin