Dutton Corpus

SA7 Contents

Related witnesses for SA7-126

 
[ID0381]SA7-126(60v-61v)(6x8)

La carta que fizo Johan agraz en la ſepultura del conde de mayorga

(61r) a qui yaze ſepultado
El virtuoſo daquel
Conde don Johan pimentel
Que murio en tal eſtado
5Era moço auiſado
Eſforçado bien trayente
E muy ſingular amado
Animoſo a toda gente
item era bien valiente
10En el arnes muy aſido
V(↑e)n(!)uſa que fueſe falleſçido
Sin dubda tan breuemente
A ſu rey muy obediente
E por la onra pugnante
15Mas abſente que preſente
A los amigos conſtante
mas auia buen ſemblante
Amador de la verdat
En guardar el amiſtat
20Era muy perſeuerante
Vn cruçifixo delante
El ſu poſtrimero dia
La poſtrera voz clamante
Ffue valme ſanta maria
25en la ſu poſtremeria
Ouo mucha contriçion
Demandando redemçion
Sus lagrimas deſpendia
Quel temor le confrigia
30De la temida carrera
Dexo nueſtra compania
Es adonde nos eſpera
Su vida falleſçedera
Ffueron veynte ſiete anyos
35Partir a reynos eſtranyos
Su deſeo todo era
De leuar emp(↑r)eſa fuera
Por el era publicado
Duro en ſu buen eſpera
40Faſta dos anyos paſados
En el anyo que nombrado
Fue de mil e quatroçientos
Et tres dias vet los cuentos
Seteno acreçentado
45Eſte numero llegado
A catorçe de febrero
Ffue del mundo rebatado
El valiente cauallero