Dutton Corpus

SA7 Contents

Related witnesses for SA7-263

[ID2629]SA7-263(122r-122v)(6x8, 4)

Remedio a la Reyna daragon por labſençia del Rey ſanta ffe

Alta Reyna porque veo
Que ſoys tan abſentada
Del buen Rey con gran deſſeo
En penſamiento axenada
5Medeçina muy prouada
Vos dare bien preſtamente
Que ſeyendo obediente
Seredes breue curada
El deſſear con turmento
10E quexoſſa tribulança
Yo vos do por Regimiento
La talaya deſperança
E tomando ſegurança
Deſdagora folgaredes
15Al gentil Rey quan veredes
En gran bienauenturança
Si con el amor eſtranyo
Penſaredes por ventura
El Rey non Reçiba danyo
20En eſta fuerte angoſtura
Vna conſerua muy pura
Pienſſe quien oneſto ama
Mas conſuel(l#)a depues fama
Que bien que aqui mas dura
25Porque a vezes interpreta
La inclinaçion vmana
Si bien que ſoys diſcreta
E del Rey auredes gana
Quando muy blando cometa
30La ſubtil concupiçençia
Sea freno continençia
Por muy ſegura dieta
Por eſtar el Rey defuera
Y aſſi tan abſentado
35Penſſades quamor muera
Como abſente canſſado
La ffe del Rey bien criado
E lealtança coſtante
Seran propios Reſtaurante
40En vuestro pienſſo afanado
Quan vuestro ſeſo conçiba
Penſando todo contrario
Qualque llaga non Reçiba
El Rey ardit voluntario
45Yo vos do por letuario
Ffecho ſenyal de memoria
Es afeyte de la gloria
E glorioſo veſtuario

Ffin

Mi conſolaçion notoria
50Guardat en ſecret armario
Y en lugar dotriſtoria
Sea leher ordinario