Dutton Corpus

SA7 Contents

Related witnesses for SA7-271

[ID2637]SA7-271(128v-129r)(4x8, 4)

Lohor al Rey en la trayçion ffecha por la Reyna Napoletana ſanta ffe

Quien oſa muerte ſentir
No es Rey ſu propio nombre
Mas cauallero y ombre
Que muere por bien beuir
5Quien dize de uos lo digo
Sin dementir no a gana
La puerta de capuana
Sera deſto buen teſtigo
Alli non ſeruaſtes ley
10De ſenyor mas de guerrero
Trocaſtes por companyero
Las çirimonias de Rey
Non vos llamauan ſenyor
Ny moſtrar por tal touido
15Mas fueſtes bien conbatido
E mexor conbatedor
Eſſa vuestra gente
Que con vos Reçuçitaron
Dizen como vos fallaron
20En las armas muy ardiente
Mereçedes ſer loado
Que vos fazedes tener
Primero por vos valer
Sin Rey no ſer maginado
25Pues que biuiendo beuimos
E uos otra vez naçiſtes
Por el afan que ſentiſtes
E dolor que padeçimos
De pentacoſta el dia
30Que fue dios nuestro pilar
Doble fieſta çelebrar
Deuemos con alegria

Ffin

Pues que ſeguides la uia
De los peligros temptar
35Quien puede y ſabe guardar
Guarde vuestra ſenyoria