Dutton Corpus

SA7 Contents

Related witnesses for SA7-361

 
[ID2245]SA7-361(175v-176v)(4, 5x8)

Santa ffe

Pues que ſuerte non cordura
Ffaze al hombre proſperar
Lo que mas conuien mirar
Atender buena uentura
5 Si por diſcreçion penſades
Oy ganar vueſtro proçeſſo
Penſat traedes por eſſo
Armas con que uos matedes
Si ſeruiçios allegades
10Diran que ſoes antigo
E pues bondat es locura
Atender buena uentura
El crim no es condepnado
Saluo el mal proueydo
15Mas ſera bien concluydo
E con aſtuçia cauſado
Aquel es magnificado
“Gloria in ecçelſis deo” [ID3448 Cita]
E pues uiçio da folgura
20Atender buena uentura
En ques prende que onores
Ha ſin titol el groſero
E el ſotil e ſançero
A pobreças e dolores
25Ffalta es de regidores
De exſecuçion e buen ſeſo
Pues no ual ſaber ni cura
Atender buena uentura
Ya ſon los grandes finados
30Exemplos muy exçellentes
E ſon muertos los preſentes
Non ioyas de los paſados
Por do todos los eſtados
An deſorden e tenpeſta
35E pues pereçe meſura
Atender buena uentura
La uirtut pero loada
Tiene candela en mano
Mas por uos buen Rey umano
40Alfonſo deſta vegada
Eſpera ſer leuantada
E retornar en ſu trono
E quitar lo ques murmura
Atender buena uentura